البلفدير من اهم منتزهات تونس واجملها

 حديقة البلفدير او منتزه البلفدير تم تصميمه ووضع تخطيطه من قبل واحد من اشهر واكبر بستانيي مدينة باريس

l architecte paysagiste

" جوزيف لافوركاد" Joseph La Fourcade

الي حط التصميم من غير ما يزور تونس ولا يجيها لكنه صمم منتزه البلفدير من باريس وكان المخطط متاعه يشبه منتزه

les buttes de Chaumont

الموجود في الدائرة 19 في باريس

منتزه البلفدير تم انشاؤه عام 1892 والهدف الرئيسي كان جذب المستوطنين الفرنسيس باش يجيو يستوطنوا بلادنا هذاكة علاش تم اعتباره جزء من حركة التحديث في تونس

منتزه البلفدير الي نعتبروه رئة مدينة تونس ما تم افتتاحه كان عام 1910 حتى طلعت اشجاره ونباته بلقدا

يعني تطلب افتتاحه قرابة 20 سنة وهذه مش حاجة غريبة خاطره تم تأسيسه فوق هضبة او جبل صغير كان فيها زيتون جالي( بري) واسمه الجبل الاخضر

نلقاو عدد كبير من النباتات والاشجار في المنتزه هاك علاش نجمو نعتبروه تراث ايكولوجي في حد ذاته، وفمة 80 نوع من النباتات تم جلبها من مختلف بقاع العالم من استراليا و امريكا الجنوبية وجنوب فرنسا فنلقاو مثلا الخروب، الصنوبر البحري ، ونلقاو قريب من المدخل شجرة عملاقة رائعة عمرها اكثر من قرن توا وهي تنتمي لعايلة ficus macrophylia تم جلبها من استراليا وتحديدا من Queensland

النباتات الموجودين في المنتزه تم زرعهم والاهتمام بهم في البداية في حديقة تجريبة موجودة قريب من المنتزه

كما نلقاو فيه حيوانات برية حرة تحوس في مساحة تقارب 100هكتار كما الحرباء ( ام البويا) جران وسلاحف يونانية وبعض الانواع من الثعابين وبرشة طيور كما serin ciniو tourterelle و السنونو والطاووس

اسم البلفدير le belvédère يعني belle védere اي المنظر الجميل

ومن اعلى قمة في المنتزه ( 60م ) نطلوا على كامل مدينة تونس وبحيرة تونس وهضبة قرطاج و نشوفو جبل التوبة ( سيدي بلحسن ) و جبل زغوان وجبل الرصاص وجبل بوقرنين

قبل كان فمة في المنتزه حجرة تتسمى طاولة التوجيه table d orientation تشير لاي حاجة نجمو نشوفوها من اعلى المنتزه

حضرها المصمم Walker لمكتب السياحة التونسي وقد تم نقلها فيما بعد من بلاصتها الاصلية وهي توا موجودة على بعد بعض الامتار من المنتزه ( ساحة باستور)

في عهد الاستعمار كان الفرنسيس يلعبوا الكره الحديدية في ساحة العلم توا والي كانت تتسمى قبل le plateau والي فيها طريق مزيانة يوصلنا لقبة الهواء الي حكيتلكم عليها قبل في منشور قديم والي تم نقلها من قصر الوردة وتعاود تركيبها في المنتزه لتزيينه

نلقاو مش بعيد على القبة بنيات صغيرة تشبه لكوخ الاسكيمو وهي تمثل 7 انفاق ممتدة من ممشى قبة الهواء لواد السبيعي تبنات في الحرب العالمية الثانية وسكن فيها قائد الفيلق الافريقي التابع للمارشال الالماني روميل الي قاده بين 1941و 1943

وسط هالانفاق نلقاو بعض الحمامات و غرف اجتماعات وللاسف تم غلق الانفاق هذه بعد الثورة خوفا من انها تتحول لاوكار المنحرفين

ولتوا مازالت مسكرة

مدينة كولونيا الالمانية ومدينة تونس عملوا توأمة من 50سنة ووقتها تم انشاء حديقة الحيوانات الي صمم مناظرها الطبيعية مهندسين من كولونيا

في الوقت هذاكة الحديقة كانت تضم 150 نوع من الحيوانات الافريقية كما طائر النحام والفيلة و الاسود ......

وكانت تستقبل تقريبا مليون زائر في العام

في قلب حديقة الحيوانات نلقاو معلم مزيان برشة وهو الميضة المصنفة معلم تاريخي من عام 1912 وهي مسكرة للاسف عندها سنين وهي ميضة تم نقلها من مدينة تونس العتيقة ووضعها غادي

نلقاو زادة في المنتزه الكازينو الي هو حاليا تابع لوزارة الدفاع وهو مكان لاجتماع الضباط ولاحتفالاتهم وسهرياتهم

البلفدير تديره ولاهية به بلدية تونس مع جمعية اصدقاء البلفدير

البلفدير من اهم منتزهات تونس واجملها

Posted in: